Шымкент қаласында медициналық қызмет сапасын арттыру, қолжетімділікті қамтамасыз ету және аурулардың алдын алу бағытындағы жұмыстар үнемі назарда. Соңғы жеті айда атқарылған істер мен алдағы жоспарлар қала әкімдігінің күн тәртібінен түскен емес. Бұл ретте ағымдағы жылдың 7 айында саланың даму қарқыны мен өзекті мәселелері қала әкімінің орынбасары Арман Сәбитовтің төрағалығымен өткен кеңейтілген Алқа отырысында егжей-тегжейлі талқыланды.
Жиынға Шымкент қаласының Денсаулық сақтау басқармасы, Медициналық және фармацевтикалық бақылау департаменті, сондай-ақ мемлекеттік және жекеменшік медициналық ұйымдардың басшылары қатысты.
Жүктемені азайтқан жаңа емханалар
Алқа отырысында Денсаулық сақтау басқармасының басшысының міндетін атқарушы Сауле Сансызбайқызы баяндама жасап, саланың жеті ай ішіндегі қорытындысы мен даму динамикасына тоқталды. Оның айтуынша, 2023–2025 жылдары Шымкент қаласында 14 жаңа емхана ашылған. Бұл медициналық мекемелердің ашылуы тұрғындар үшін алғашқы медициналық-санитариялық көмекті алу қолжетімділігін арттырып, емханалардағы орташа жүктемені 25 мыңнан 21 мың адамға дейін төмендетуге ықпал еткен.
Ауруханалардағы төсек-орын саны артуда
Қаладағы стационарлық көмек көрсету де жүйелі дамып келеді. 2024 жылы ауруханаларда 4 436 төсек-орын болса, 2025 жылы олардың саны 4 894-ке жетпек. Яғни, бұл – 10%-ға арту деген сөз. Мұндай көрсеткіш қала тұрғындарының жоспарлы және шұғыл медициналық көмекке дер кезінде қол жеткізуіне мүмкіндік бермек.
Сала көрсеткіштері – бақылауда
Басқарма басшысы қала денсаулық сақтау жүйесінің республика көлемінде «жасыл аймақта» екенін атап өтті. Бұл – инфекциялық аурулардың таралуы, профилактикалық тексерулер мен скрининг көрсеткіштері бойынша жағдай тұрақты екенін білдіреді. Алайда, емханалардағы бірқатар индикаторлардың орындалуы жіті бақылауды қажет етеді.
Баяндамада ерекше назар аударылған бағыттар:
Ана мен бала денсаулығын сақтау
Қан айналымы жүйесі ауруларын ерте анықтау
Онкологиялық ауруларды бастапқы кезеңде диагностикалау
Жедел жәрдем қызметі мен алғашқы медициналық көмектің сапасын арттыру
Бұл бағыттар бойынша нақты ұсыныстар мен жоспарлар алға қойылды.
Міндетті әлеуметтік медициналық сақтандыру – тұрақты негізде
Жиын барысында міндетті әлеуметтік медициналық сақтандыру жүйесінің I жартыжылдықтағы нәтижелері де қаралды. Қала халқының басым бөлігі жүйеге тартылған. Бұл тұрғындардың тегін және қосымша медициналық қызметтерді уақытында алуына жол ашуда.
Бұған қоса, медициналық және фармацевтикалық бақылау департаментінің қызметі, туберкулезбен күрестегі жағдай, инфекциялық аурулардың эпидемиологиялық ахуалы – барлығы жан-жақты сарапқа салынды.
Кейбір түйткілдер де назардан тыс қалмады
Алқа отырысының қорытындысында саладағы оң нәтижелермен қатар бірқатар өзекті мәселелер де қозғалды. Атап айтқанда:
Кей медициналық ұйымдарда кадр тапшылығы байқалады
Қала шетінде орналасқан елдімекендерде бастапқы медициналық көмекке қолжетімділік төмен
Жаңа технологиялармен жабдықтау, цифрландыру процесін жеделдету қажет
Осы мәселелерді шешу мақсатында нақты ұсыныстар мен мерзімді жоспарлар бекітілді.
Шымкент қаласы тұрғындарының денсаулығын жақсарту – әкімдік пен салалық басқармалардың басты міндеті. 7 айлық қорытынды отырысында осы бағытта нақты істердің атқарылып жатқаны байқалды. Жаңа емханалар мен ауруханалар, кадрлық әлеуетті арттыру, медициналық көмектің қолжетімділігі мен сапасын көтеру – барлығы тұрғындардың әл-ауқатын арттыруға бағытталған.
Алдағы кезеңде емханалардағы цифрландыруды аяқтау, медициналық инфрақұрылымды жаңғырту және саладағы тең қолжетімділікті қамтамасыз ету басты назарда болмақ.
