Жоспарлы іс-шаралар аясында Шымкент қалалық №4 емханасында туберкулез ауруының алдын алу мәселелеріне арналған семинар ұйымдастырылды. Семинарға емхана қызметкерлері, дәрігерлер мен медициналық мамандар қатысып, туберкулезге қарсы іс-шаралардың тиімділігін арттыруға бағытталған маңызды мәселелер талқыланды.
Кездесудің негізгі мақсаты – Қазақстан Республикасы Денсаулық сақтау министрлігінің нормативтік құжаттарында бекітілген туберкулез профилактикасы жөніндегі жаңа қағидалар мен әдістемелерді түсіндіру және бекіту. Бұл шара санитариялық-эпидемияға қарсы іс-шаралардың жүйелілігін қамтамасыз етуге және оның сапасын арттыруға бағытталды.
Фтизиатр Айгүл Андақұлова ҚР ДСМ-нің «Инфекциялық аурулардың (туберкулез) алдын алу жөніндегі санитариялық-эпидемияға қарсы, санитариялық-профилактикалық іс-шараларды ұйымдастыруға және жүргізуге қойылатын талаптар» туралы №29 бұйрығының мазмұнын жан-жақты түсіндірді. Ол санитариялық-эпидемияға қарсы іс-шараларды ұйымдастыру және инфекциялық қауіпсіздікті қамтамасыз ету шаралары туралы мәлімет берді.
Ал жалпы тәжірибелі дәрігерлер бөлімінің меңгерушісі Феруза Қонаева №214 бұйрық аясында туберкулез профилактикасы жөніндегі іс-шараларды жүргізу қағидаларын баяндады. Ол туберкулездің ерте анықталуы, байланыста болғандарды бақылау, диспансерлік бақылау және халықты ақпараттандыру мәселелеріне ерекше мән берді.
Семинар барысында қатысушылар белсенді түрде сұрақ қойып, тәжірибелерімен бөлісті. Ерте диагностика, медициналық ұйымдар арасындағы үйлесімділік және профилактикалық жұмыстардың тиімділігін арттыру туралы мәселелер талқыланды.
Сонымен қатар, әлеуметтік осал топтарға назар аудару, медициналық қызметкерлердің біліктілігін арттыру қажеттілігі және заманауи бақылау әдістерін енгізу мәселелері қаралды.
Осы секілді семинарлар медициналық мамандардың кәсіби деңгейін арттырып, олардың арасында тәжірибе алмасуға жол ашып, туберкулезге қарсы профилактика жұмысын күшейтуге септігін тигізеді. Бұл шаралар өңірдегі эпидемиологиялық жағдайды жақсартуға және тұрғындардың денсаулығын қорғауға бағытталған жүйелі жұмыстардың бір бөлігі болып табылады.
Денсаулық сақтау министрлігінің бұйрықтарын орындау, мамандардың біліктілігін көтеру және жүйелі жұмыс туберкулез ауруының таралуын төмендетуге және уақтылы емдеуді қамтамасыз етуге мүмкіндік береді. Шымкент қалалық №4 емханасы тұрғындар денсаулығын қорғау үшін осындай ақпараттық-оқыту шараларын әрі қарай да тұрақты түрде өткізуді жалғастырады.
