Шымкент қаласының Әл-Фараби ауданында қысқы маусымға дайындық жұмыстары жоспарлы түрде жүйелі жүргізілуде. Бұл бағыттағы жұмыстар тұрғындардың жайлы өмір сүруін қамтамасыз етуге, әлеуметтік-инфрақұрылымды дамытуға және экологиялық ахуалды жақсартуға бағытталған. Аудан әкімдігі мен қала басқармасының тығыз үйлестіруімен жүзеге асырылып жатқан бұл шаралар тұрғындардың сенімін арттырып, ауданның көркейіп, дамуына серпін береді.
Әл-Фараби ауданында барлығы 931 көппәтерлі үй бар. Оның 861-і орталықтандырылған жылу жүйесіне қосылған және бүгінде олардың 97 пайызы қысым сынағынан сәтті өткен. Бұл көрсеткіш жылу маусымының тұрақты және қауіпсіз өтуін қамтамасыз етеді. Орталық жылумен қамту деңгейінің жоғары болуы тұрғындардың қыста жылылықта, жайлы өмір сүруін қамтамасыз етудің негізі болып табылады.
2025 жылы «Тұрғын үй қорын жаңғырту» бағдарламасы аясында аудан бойынша 20 көпқабатты үй жөндеуден өтуде. Қазіргі таңда 13 үйдегі жөндеу жұмыстары аяқталды. Сонымен қатар, реновация жобасы аясында биыл 4 мекенжайда жаңа құрылыс жұмыстары жүргізіліп жатыр. Бұл шаралар 2029 жылға дейін 28 апатты үйді бұзып, ондағы 235 меншік иесін жаңа және сапалы тұрғын үймен қамтамасыз етуге бағытталған.
Базарларды жаңғырту және қоғамдық орындарды дамыту
Әл-Фараби ауданының әлеуметтік-экономикалық дамуында сауда орындарының жаңғыртылуы маңызды рөл атқарады. Соңғы уақытта аудан аумағындағы бірнеше базар жаңғырту жұмыстарына қолдау көрсетілуде. «Орталық Қырғы» базарының 50 пайызы жөнделіп, заманауи шатырлар мен павильондар орнатылды. Бұл сауда орындарының қауіпсіздігін және жұмыс тиімділігін арттырып, саудагерлер мен сатып алушыларға қолайлы жағдай жасауға септігін тигізеді. Сонымен қатар, «Назым апа» және «Көктем» базарларында демонтаждау жұмыстары жүргізілуде, бұл аудандағы ескірген және қолайсыз жағдайдағы нысандарды жаңғыртуға мүмкіндік береді.
Экологиялық тазалық және қоғамдық шаралар
Тұрғындардың тұрмыс сапасын жақсарту мен ауданның экологиялық ахуалын сақтау мақсатында «Таза Қазақстан» акциясы аясында жүйелі түрде сенбіліктер ұйымдастырылуда. Биылға дейін ауданда 41 рет сенбілік өткізілді. Оған шамамен 8 мың адам мен 190 техника жұмылдырылып, 504 тонна қоқыс шығарылды. Бұл ауданның тазалығы мен экологиялық жағдайының жақсаруына айтарлықтай үлес қосты.
Қала тазалығын қолдау мақсатында негізгі көшелерге 275 жаңа қоқыс жәшігі орнату жоспарланып отыр. Бұл қоқыс жинау жүйесін жетілдірумен қатар, тұрғындар мен қонақтардың көшелерді таза ұстауына оң ықпал етеді.
Бұл туралы бүгін Әл-Фараби ауданы әкімі Мықтыбеков Маратбек Сәменбекұлы арнайы мәлімдеме жасап, атқарылып жатқан жұмыстардың маңыздылығын атап өтті. Оның айтуынша, қысқы маусымға дайындық пен тұрғындардың тұрмыс сапасын жақсарту — аудандағы әлеуметтік-инфрақұрылымды жетілдірудің басты бағыттарының бірі. Жоспарлы түрде жүзеге асырылып жатқан бұл жұмыстар ел тұрғындарына жайлы, қауіпсіз және таза орта қалыптастыруға бағытталған.
Әл-Фараби ауданында қысқы маусымға дайындық пен тұрмысты жақсарту бағытындағы жүйелі жұмыстар халықтың күнделікті өмірін жеңілдетуге, қауіпсіздікті арттыруға және ауданның дамуына негіз болып отыр. Тұрғын үйлерді жөндеу, базарларды жаңғырту, сенбіліктер өткізу және экологиялық жағдайды жақсарту шаралары тұрғындардың өмір сапасын арттыруға бағытталған кешенді іс-шаралар болып табылады. Бұл бастамалар ауданның әлеуметтік-инфрақұрылымын нығайтып, тұрғындардың жайлы ортада өмір сүруіне мүмкіндік жасайды.
