Шымкент қалалық балалар клиникалық ауруханасында 4 айлық сәбиге бірегей ота жасалды. Нәресте ауыр жағдайда тума сол жақты гидронефроз 3 дәрежесімен ауруханаға түскен.
Антенаталды кезеңде бақылауда болып, толық тексерілуден кейін көлемді отаға дайындық жүргізілді. Тексеру кезінде сәбиде бүйректің зәр шығару жолдары айтарлықтай тарылып, сол бүйректің қызметі төмендегені анықталған.
Балаға жоспарлы түрде сол жақты люмботомия және несепағар-түбекше сегментінің резекциясы, Хайнц-Андерсон бойынша зәр жолдары пластикасы жасалды. Ота сәтті өтіп, сәби үйіне шығарылды.
Айта кетейік, бұған дейін оталарды жасау үшін науқас балалар Астана, Алматы қаласындағы республикалық орталықтарға жолдамамен жіберілетін. Бір жылдан бері Шымкенттегі балалар клиникалық ауруханасының дәрігерлері урологиялық оталарды сәтті жасап, балаларға сапалы медициналық көмек көрсетуде. Ауруханада бүгінге дейін урологиялық 60-қа жуық ота жасалды.
Тумасынан бүйрек қызметі бұзылған балалар перзентханадан бастап бақылауға алынып және ота күні белгіленіп, денсаулық көрсеткішіне қарай шұғыл ота жасалады. Отаның ерекшелігі бүйректі қалпына келтіру болып табылады.
