Бұдан бір ай бұрын 62 жастағы Фароғат Оқилова үміттен үзіліп, тығырыққа тірелді. Тәжікстанда оған ми ісігі диагнозы қойылып, отаны жасауға ешбір дәрігер келіспеген. Қатты бас ауруы, айналу, мұрыннан қан кету – бәрі қосылып, есінен тануға дейін апарған. Алайда ол берілмеді. Жан сақтау үшін Шымкентке жол тартты.
Бұл — оның өміріндегі ең дұрыс шешімдердің бірі болды.
Қаланың көпбейінді ауруханаларының бірінде оған 8 сағатқа созылған күрделі нейрохирургиялық операция жасалып, ісік толық алынды. Бүгінде ол қалыпқа келіп, сауығып жатыр.
«Бұл аурухана жайлы таныстарымнан білдім – оларды да осында емдеген екен. Мені бірден қабылдап, толық тексеруден өткізді де, ота жасауға келісті. Қазір өзімді жақсы сезінемін, біртіндеп қалпыма келіп келемін. Дәрігерлерге кәсібилігі мен жанашырлығы үшін алғысым шексіз», – дейді Фароғат Оқилова.
Хирургияда – жасанды интеллекттің көмегі
Бүгінгі Шымкент – тек ірі мегаполис емес, медициналық инновациялар орталығына айналып келеді. Мұнда жаңа технологиялар батыл енгізіліп, емдеу сапасы үздіксіз жақсаруда.
Жасанды интеллект (ЖИ) дәрігерлердің көмекшісіне айналды. Ол диагностика процесін жеделдетіп, суреттерді талдап, ісіктің нақты орналасқан жерін көрсетіп, ота жоспарын ұсынады. Кейбір ауруханаларда интеллектуалды роботтар да нақты шешім қабылдауға көмектесіп жатыр.
Бақытжан Позилов, Шымкент қаласындағы №2 көпбейінді аурухананың бас дәрігері:
«Бұрын дәрігер мен пациентке диагноз қою үшін уақыт қажет еді. Қазір ЖИ бірнеше секундта ишемия ма, әлде қан құйылу ма – соны анықтай алады. Болашақта УДЗ мен ФГДС құрылғыларына да ЖИ енгізуді жоспарлап отырмыз. Сонымен қатар ПАКС жүйесін іске қосып, медициналық бейнелерді тез таратуға мүмкіндік жасаймыз».
Технология мен адамгершілік — қатар жүреді
Ең бастысы — бұл технологиялар Шымкент тұрғындары үшін қолжетімді. Міндетті әлеуметтік медициналық сақтандыру (МӘМС) жүйесі аясында қымбат әрі күрделі операциялар тегін жасалады. Ал шетел азаматтарына мұндай оталар он миллиондаған теңгеге түседі.
Алайда Шымкент медицинасы тек жергілікті халықпен шектелмейді. Мұнда басқа аймақтар мен елдерден де емделуге келетіндер көп. Өйткені бұл қалада:
білікті әрі тәжірибелі дәрігерлер бар,
заманауи медициналық жабдықтар қолданылады,
әр пациентке жанашырлықпен қарайды.
Шымкент – Орталық Азияның жаңа медициналық хабы
Шымкент халықаралық деңгейдегі медициналық орталық ретіндегі мәртебесін күн сайын нығайтып келеді. Бұл жерде адамдардың өмірі құтқарылады, үміттері қайта оянады, ал Қазақстан медицинасының – сапа, сенім мен кәсібилікті білдіретіні дәлелденуде.
Жасанды интеллект дәрігерді алмастырмайды – ол онымен бірлесе жұмыс істейді. Ал адам мен технология бірігіп әрекет еткенде – нағыз ғажайыптар орын алады.
Шымкент тек тәнді емдемейді. Ол адамдарға ертеңгі күнге деген сенімді қайта сыйлайды.
